முதலாம் ஆண்டு வகுப்பு கல்லுாரிகளில் அக்டோபர் 4ல் துவக்கம்
அரசு மற்றும் தனியார் கலை, அறிவியல் கல்லுாரிகளில், முதலாம் ஆண்டு வகுப்புகளை அக்டோபர் 4ம் தேதி துவங்க, கல்லுாரி கல்வி இயக்குனரகம் உத்தரவிட்டுள்ளது.
இது குறித்து, மண்டல இணை இயக்குனர்களுக்கு, கல்லுாரி கல்வி இயக்குனர் பூர்ணசந்திரன் அனுப்பிஉள்ள சுற்றறிக்கை:அனைத்து கல்லுாரிகளிலும் இளநிலை படிப்பவர்களில், இரண்டு, மூன்றாம் ஆண்டு மாணவர்கள் மற்றும் முதுநிலையில் இரண்டாம் ஆண்டு மாணவர்களுக்கு, சுழற்சி முறையில் வகுப்புகள் நடத்தப்படுகின்றன.
இந்நிலையில், முதலாம் ஆண்டுக்கு மாணவர் சேர்க்கை நிறைவு பெற்றுள்ளதால், முதலாம் ஆண்டு மாணவர்களுக்கு 4ம் தேதி முதல், நேரடியாக வகுப்புகள் நடத்த கல்லுாரிகள் நடவடிக்கை மேற்கொள்ள வேண்டும்.புதிதாக சேர்ந்துள்ள மாணவர்களுக்கு, புத்துணர்வு பயிற்சி வழங்க, கல்லுாரி முதல்வர்கள் ஏற்பாடுகள் செய்ய வேண்டும்.
தகுதியுள்ள அனைத்து மாணவர்களும் தடுப்பூசி செலுத்தி கொள்ள வேண்டும். கல்லுாரி வளாகங்களில் முக கவசம் கட்டாயம் அணிய வேண்டும். சமூக இடைவெளியை தவறாமல் பின்பற்ற வேண்டும். இதுகுறித்து அரசு, அரசு உதவி மற்றும் சுயநிதி கலை, அறிவியல் கல்லுாரிகளுக்கு உரிய அறிவுரை வழங்க வேண்டும்.