இரண்டாம் கட்ட திருப்புதல் தேர்வில், வினாத்தாள் வெளியாகாமல் தடுக்க, இரண்டு வகை வினாத்தாள்கள் தயாரிக்கப்பட்டு உள்ளதாக தகவல் வெளியாகி உள்ளது.

தமிழகத்தில், கடந்த பிப்ரவரி மாதம் 1 ஆம் தேதி முதல், கொரோனா தடுப்பு நடவடிக்கைகளை பின்பற்றி, 1 ஆம் வகுப்பு முதல் 12 ஆம் வகுப்பு வரையிலான மாணவர்களுக்கு பள்ளிகள் திறக்கப்பட்டு வகுப்புகள் நடத்தப்பட்டன. ஒமைக்ரான் பரவல் காரணமாக, 10 மற்றும் 12 ஆம் வகுப்பு மாணவர்களுக்கு கடந்த ஜனவரி மாதம் நடைபெற இருந்த திருப்புதல் தேர்வு, பிப்ரவரி மாதத்திற்கு ஒத்தி வைக்கப்பட்டு நடத்தப்பட்டது.

அப்போது, திருப்புதல் தேர்வு வினாத்தாள்கள் தேர்வுக்கு முன்கூட்டியே சமூக வலைதளங்களில் லீக் ஆகியது. இது மாணவர்கள், பெற்றோர்கள் மற்றும் சமூக ஆர்வலர்களிடையே கடும் அதிர்ச்சியை ஏற்படுத்தியது. 

இந்நிலையில், 10 மற்றும் 12 ஆம் வகுப்புகளுக்கான இரண்டாம் கட்ட திருப்புதல் தேர்வு, இன்று தொடங்க உள்ளது. இதில், வினாத்தாள் வெளியாகாமல் தடுக்க, இரண்டு வகை வினாத்தாள்களை பள்ளிக் கல்வித் துறை தயாரித்து உள்ளதாக தகவல் வெளியாகி உள்ளது. ஒருவேளை ஒரு வினாத்தாள் வெளியானால் மாற்று வினாத்தாளை தேர்வில் வழங்க முடிவு செய்துள்ளனர். 10 மற்றும் 12 ஆம் வகுப்பு மாணவர்களுக்கு இரண்டாம் கட்ட திருப்புதல் தேர்வு, இன்று(28/03/2022) துவங்கி, ஏப்ரல் மாதம் 5 ஆம் தேதி முடிவடைய உள்ளது குறிப்பிடத்தக்கது.