அரசு ஊழியர்களுக்கான துறை தேர்வுகள் பிப்ரவரியில் நடத்தப்படும்; இதற்கான விண்ணப்பங்களை தாக்கல் செய்யலாம்' என TNPSC அறிவித்துள்ளது.

அரசு பணியாளர் தேர்வாணையமான TNPSC  தேர்வு கட்டுப்பாட்டு அதிகாரி கிரண் குராலா வெளியிட்டுள்ள அறிவிப்பு: அரசு ஊழியர்களுக்கான துறை தேர்வுகள், இந்த ஆண்டு முதல் கணினி வழி தேர்வாக அறிமுகம் செய்யப்பட்டுள்ளது. எனவே, துறை தேர்வுக்குவிண்ணப்பிக்கும் தேர்வர்கள், தங்களின் ஆதார் விபரங்களை கட்டாயம் தாக்கல் செய்ய வேண்டும்.

இந்த ஆண்டு டிசம்பரில் நடத்த வேண்டிய துறை தேர்வு, அடுத்த ஆண்டு பிப்ரவரி 1 முதல் 9 வரை நடத்தப்படும். இதற்கான 'ஆன்லைன்' விண்ணப்ப பதிவு துவங்கியுள்ளது. டிசம்பர் 21க்குள் விண்ணப்பிக்க வேண்டும். கொள்குறி வகையில், சரியான விடையை தேர்வு செய்யும் 'அப்ஜெக்டிக்' வினாத்தாளுக்கு, 'ஆன்லைன்' வழியில் தேர்வு நடத்தப்படும்.

அதேநேரம், விரிவாக பதில் எழுத வேண்டிய தேர்வுகளுக்கு, வழக்கம்போல, எழுத்து தேர்வாகவே நடத்தப்படும். துறை தேர்வுக்கான திருத்தப்பட்ட பாடத்திட்ட விபரங்கள், www.tnpsc.gov.in இணையதளத்தில் வெளியிடப்பட்டுள்ளன.இவ்வாறு அதில் கூறப்பட்டுள்ளது.