பள்ளிக் கல்வி இயக்ககம், தொடக்ககல்வி இயக்ககம் மற்றும் சென்னை மாநகராட்சி ஆகியவற்றில் நிரப்பப்படவேண்டிய 2582 ஆசிரியர்  காலிப் பணியிடங்களுக்கு விண்ணப்பிப்பதற்கான கால அவகாசத்தை ஆசிரியர் தேர்வு வாரியம் நீட்டித்துள்ளது.

முன்னதாக, ஆசிரியர் தேர்வு வாரியம் மூலம் பட்டதாரி ஆசிரியர் / வட்டார வளமைய பயிற்றுநர் (Graduate Teachers/Block Resource Teacher Educators) 2023 - 2024 ஆம் ஆண்டிற்கான காலிப்பணியிடங்களுக்கு போட்டித் தேர்வு மூலம் நேரடி நியமனம் செய்வதற்கு கடந்த  25ம் தேதி அன்று வெளியிட்டது. விண்ணப்பதாரர்கள் இணையவழி விண்ணப்பங்களை பதிவேற்றம் செய்ய 07.12.2023 மாலை 5 மணிவரை கால அவகாசம் வழங்கப்பட்டது.

இந்நிலையில், உயர்நீதிமன்ற சென்னை இடைக்கால தீர்ப்பாணையின்படியும் மற்றும் மிக்ஜாம் புயல் மழையின் காரணமாகவும் மேற்காண் பணியிடங்களுக்கு இணையவழி வாயிலாக விண்ணப்பங்கள் பதிவேற்றம் செய்ய கடைசி தேதி 07.12.2023 -லிருந்து 13.12.2023 மாலை 5 மணி வரை தற்போது நீட்டிக்கப்பட்டுள்ளது.

இதனைதொடர்ந்து, விண்ணப்பதாரர்கள் தங்களது இணையவழி விண்ணப்பத்தில் திருத்தம் (Edit Option) மேற்கொள்ள அவகாசம் வழங்க கோரியதின் அடிப்படையில், பட்டதாரி ஆசிரியர் / வட்டார வளமைய பயிற்றுநர் பணியிடத்திற்கு விண்ணப்பித்து கட்டணம் செலுத்தியவர்கள் தங்களின் விண்ணப்பத்தில் திருத்தம் (Edit Option) மேற்கொள்ள விரும்பினால் 14.12.2023 மற்றும் 15.12.2023 ஆகிய இரண்டு நாள்களுக்கு திருத்தம் செய்ய ஆசிரியர் தேர்வு வாரிய இணையதளத்தில் வழிவகை செய்யப்பட்டுள்ளது தெரிவிக்கப்படுகிறது